超級月亮將會喺8月31日現身，而呢次滿月又被稱為「藍月亮」。
當晚真係會見到一個藍色嘅月亮？非也！「藍月亮」其實係當同一個陽曆月份裏面出現兩次滿月時，對第二次滿月嘅稱呼，並唔係指月亮會變成藍色。
雖然「藍月亮」一啲都唔藍，但係當晚嘅超級月亮依然值得觀賞。每當月球處於或者差唔多處於軌道上距離地球最近嘅位置，而咁啱又係滿月嘅時候，所謂嘅超級月亮就會出現。月球本身雖然無變大，但係基於「近大遠小」嘅原理，令超級月亮喺視覺上睇落比平時嘅滿月更大。大幾多呢？以上年7月為例，當時超級月亮嘅視面積比同年1月嘅全年最細滿月大接近30%，同平時嘅滿月比較就大15%左右。
月亮將會喺當晚19:07喺東邊升起，由於超級月亮比平時嘅滿月更光，想影到更多細節（例如較深色嘅月海）的話，可以嘗試以下方法：
如果手機嘅相機有專業/手動模式：
1️⃣ 適當地放大影像（放得越大唔等於越清晰）；
2️⃣ 輕觸螢幕上嘅月亮或手動去對啱焦；
3️⃣ 將感光度 (ISO) 調至較細嘅數值（例如50或100）令影像更暗、更清晰；
4️⃣ 調校快門至較快嘅速度（較細嘅數值）以減低手震造成嘅影響；
5️⃣ 微調感光度同快門速度，直至見到月亮嘅細節之餘，又唔會太暗；
6️⃣ 咔嚓！恭喜你影到一幅光暗分明嘅月亮相片！
如果手機冇專業/手動模式：
1️⃣坊間唔少手機應用程式都有手動控制相機參數嘅功能，安裝後跟住上面嘅步驟調節；或者
2️⃣喺手機鏡頭前面放置減光鏡片（可以試吓用太陽眼鏡），令得到嘅影像暗啲。
最好用埋腳架又或者將手機放喺穩定嘅物件上，咁張相就會更清晰。