阿信屋繼零食、家電、凍肉、化妝品後，又有全新搞作！今次仲要真係估你唔到！阿信屋老闆林偉駿同筆者傾開偈時，就透露將會新開「759阿信屋雲吞麵」！
你真係冇睇錯，阿信屋將進軍飲食業，搞麵檔！（近期啲新聞的確係幾匪夷所思，當今日蘋果A1你都接受到，有咩理由接受唔到阿信屋搞雲吞麵？）
林老闆就話，今次開雲吞麵檔源於阿信屋觀塘總部對面，有間麵檔佢覺得好好食，點知最後要執笠。於是林偉駿索性招攬個廚，請佢開新麵檔。「雖然間舖叫做雲吞麵，不過個廚煮啲牛雜、牛腩真係好好食！」至於店內嘅魚蛋、貢丸等丸類食品，都會用番阿信屋嘅貨，完全體現經濟學上嘅「規模經濟」（economies of scale）。
當筆者問：「咁你有賣蟹、賣海鮮，遲下會唔會開海鮮餐廳？」老闆笑住咁反問：「你係咪工作壓力太大？」
首間「759阿信屋雲吞麵」將於會長沙灣邨東京街街口，裝修將貫徹阿信屋風格，料只會有10幾張枱。林老闆話，本來可以早啲落實，不過最近先同上手租客傾掂數，預計搞掂牌照後，2至3個月後可正式開業！
至於會唔會越開越多呢，林偉駿就話，都係試吓一間先，之後再睇下點。不過睇佢上次開咗一間化妝品店後，好快又開多幾間，如果呢一間搞得好，筆者都幾相信林老闆會食過番尋味。