現年47歲韓國塑身女王鄭多燕噚日嚟咗香港，佢準備今明兩日喺港出席除夕商場騷，首次嚟港嘅佢身價高達70萬，佢自創嘅「FigureRobics」瘦身絕招，引起亞洲女士追捧。
示範健身操
鄭多燕噚日由近十名工作人員陪同抵港，大會安排24座小巴由機場接佢返中環四季酒店，捧住鮮花嘅鄭多燕等人喺大堂等check in，稍事休息就接受訪問，佢話呢次會同兩名女助教一齊示範3分鐘嘅2014年全新健身操，全套動作30分鐘，由於活動時間太趕，只能演出精髓部份。
韓國出名整容抽脂，有冇試過？鄭多燕透過繙譯話：「未創辦健身舞前，試過當年流行的減肥法。」不過佢冇明顯講係咪有抽過脂，認為運動最有效：「休息、運動、營養三缺一都不可。」佢建議大家要均衡飲食，少吃多餐，佢一日會食6餐。
鄭多燕話有香港同新加坡嘅健身老師特別去韓國向佢拜師，佢鼓勵大家要多做運動，佢明白OL時間同空間局限，打算為OL設計啲特別動作，配合番佢哋生活節奏。問佢想同香港邊個藝人合作，佢話：「偶像譚詠麟。」