全球氣候暖化，令美國波士頓龍蝦產量大增，加上美國經濟不景令需求減少，波士頓龍蝦價八年間冧價逾51%。本港酒樓來貨價過去一年亦大跌約兩成。由於本地消費力高的好食之徒，通常鍾情吃澳洲等高檔龍蝦，對波士頓這類「平價貨」興趣不大，變相令市民可以平食美國龍蝦。
據緬因州海洋資源部數據，該州龍蝦產量去年多達9,450萬斤，較1990年激增3.5倍，且08年海嘯後美國消費力轉弱壓抑需求，令波士頓龍蝦價格持續插水。當地龍蝦叫價於2005年高𥧌期達每磅4.63美元，約每斤48港元；但去年已跌價至每斤27.8港元，現價更跌至每斤23.3港元，不足一年跌價16%。
香港海鮮業聯合總會主席李彩華說：「美國斷磅計，香港用斤計，加上運費成本高，過去批發價一般都要110至120蚊，今年產量多，批發90幾蚊斤，零售價大約160蚊，街市都賣得起。」龍皇酒家飲食集團分店總經理黃培戀指，今年波士頓龍蝦當造，加上改為自行入貨，來貨價降至每斤85元，去年則介乎115元至125元一斤，一年間跌價兩至三成。
幟哥：大眾食得起
李彩華指，供港活龍蝦來自世界各地，其中波士頓龍蝦佔整體貨量約兩至三成，屬最多人食用的種類。波士頓龍蝦肉質較韌和䊹，適合西式的芝士或牛油焗，但勝在價錢最平，平均每隻約一斤重，一般市民都能負擔，故最多人吃。
著名食家、龍皇酒家老闆黃永幟（幟哥）指，波士頓龍蝦的確大跌價，「呢排肅貪，上大陸嘅貨俾海關截得好緊要，做龍蝦走私客畀大陸政府拉得好緊要仲要判咗刑，貨上唔到大陸，價錢咪一路咁跌，加上美國經濟差，食得起龍蝦嘅人唔多。」
幟哥又指，「有啲酒樓集團幾十蚊隻，嗰啲多數用美國龍蝦或加拿大龍蝦，正價嗰陣美國龍蝦都130蚊斤，而家都跌到得番60蚊斤，跌咗一半 」。至於與高𥧌期比較，「高𥧌期都係160零蚊一斤，（同𠵱家）爭100蚊到」。
波士頓龍蝦跌價，普羅百姓應最受惠，幟哥指：「𠵱家普羅大眾都食得起一份龍蝦，我見有啲酒樓集團賣60幾蚊隻，或者30、40蚊一邊；開邊焗𠵱家一般都可以食到就算一份，整啲伊麵底，都係賣百零蚊。」
根據聯合國糧食及農業組織早前的報告，中國內地對高檔海鮮需求，推動全球海鮮價格升至歷史新高，惟獨波士頓龍蝦「斯人獨憔悴」，受供求影響價格下跌。