（資料來源：蘋果日報 09-10-2010）
噚日喺灣仔行街，見到修頓球場個「灣仔書展──閱讀在修頓」，發現唔少寶可以一尋。現場分三區：新書八折區、$20區、$10區，後兩區都有啲幾新嘅書，好似$10區入面，台灣造型師小P嘅《潮男密碼》5月先出，仲有喺商務仲賣緊嘅階梯閱讀系列《一千零一夜》等，但最抵賣都算係《The Da Vinci Project》，一本書加DVD、CD都係賣$10，翻版都冇咁平。
$20區都唔錯，有本講東京文化嘅台灣書《東京》原價$110o架；入面好詳細介紹日本品牌、文化人。另外仲有萬里機構嘅《60歲的情書》，而有本圓方出版嘅《香港小吃掃街》喺外面賣緊$59，但限量27本。倪匡粉絲要留意，因為《倪匡中篇奇情武俠系列》全套12本，由$788減到$240，但限50套。
最多父母搶嘅就係兒童書，尤其係英文書，原價幾十蚊甚至成百蚊，都係減至$10、$20。同馮女士吹水，佢都話好抵，楊生仲拖埋架車仔嚟掃貨：「喺會展嘅書展，$10特價書冇呢度咁多、咁新。」
八折區，雖然有內地名作家韓寒新作《1988我想和這個世界談談》、《穿人字拖的公主》，但因為只係八折，明顯冇咁多人搶。書展即日至10日（星期日）舉行，每日11am至8pm，大會話預料三日有90,000人入場。